الأخيرة
الشغل صعب. قعدة المكاتب قاتلة. اليوم بيمر ببطء. اليوم بيروح كله وانت لازق وشك في شاشة، وانت بتختار هتاكل
الشغل صعب. قعدة المكاتب قاتلة. اليوم بيمر ببطء. اليوم بيروح كله وانت لازق وشك في شاشة، وانت بتختار هتاكل إيه، وانت سهران تخلّص شغلك أو شغل غيرك الكسلان. لو مديرك لطيف وبيقدّر، تبقى من القلة المحظوظة.
بس في النهاية، انت موظف، ولازم تشتغل وتنتج، وممكن لو قريت اللي جاي، يفرق معاك شوية:
مواعيد النوم والصحيان:
عادتنا كمصريين، إن "الويك داي" مش بيفرق عن "الويك آند" كتير، كل يوم لازم نخرج لو فيه وقت بعد الشغل، وكل يوم لازم نسهر حتى لو هنصحى ٧ الصبح. مواعيد النوم والصحيان بتتحكم في طاقتك حتى لو متخيل إنك بتعرف تسيطر.
الأكل الغير صحي:
الأكل الغير صحي، بيسحب الطاقة وبينيّم. الچانك فوود والبيبسي و٥٠٠ مج نسكافيه وعلبتين سجاير، دول ما بيدوش طاقة، دول بيهلكوك أكتر. كلُ سلطة، أطلب حاجات مشوية، شوكولاتة، موز، أشرب ماية كتير على قد ما تقدر.
ما تحطش في بالك:
الكلمة السخيفة اللي سمعتها من حد معاك في الشغل أو من مديرك ع الصبح، عدّيها وأشتغل. لو حطيتها في بالك، هتفضل تستهلك أعصابك وتركيزك اليوم كله وأحيانًا الأسبوع كله.
أسمع مزيكا:
لو شغلك يسمح، حاول تبقى دايمًا في ودنك مزيكا، بتهدّي وبتخليك مركز ومنعزل عن العالم.
النصيحة ما بتقتلش:
لو فيه حد بيحاول يديك نصيحة في شغلكم، مش عيب خالص إنك تستفيد منها، مش معناها إنك حمار أو إنه بيتنطط عليك، خدها منه، نفعتك تمام، ما نفعتكش، تمام برضه.
خليك في نفسك:
تجنب مقارنة نفسك بغيرك. هو ليه ده بياخد فلوس أكتر؟ هو ليه أنا الوحيد اللي باجي بدري؟ لو ليه ده واخد أجازة بريدچ وأنا ما أتوافقليش علي أجازتي؟…المقارنة طول الوقت دي هتجننك انت في الأخر. شوف حقك فين وخده، من غير مقارنة بغيرك.
خليك محترم:
خليك شخص وبشوش وخدوم وما بتتكلأشمش عن حد، غير كده هتتكره. و لما بتتكره في مكان، أكيد بيبقى صعب عليك تروحه كل يوم..
