محافظ كفر الشيخ سعد الحسينى -ربنا يهديه- ويهدى أمثاله من المدعين بأنهم دعاة إسلام فعندما قدم إلى المحافظة بعد أن

محافظ كفر الشيخ سعد الحسينى -ربنا يهديه- ويهدى أمثاله من المدعين بأنهم دعاة إسلام فعندما قدم إلى المحافظة بعد أن صدر قرار له بأن يكون على رأس الجهاز التنفيذى بها كمحافظ قال بالحرف الواحد بعد وصوله لديوان عام المحافظة أنه مبفهمش فى العمل التنفيذى وشغلتى هى الدعوة إلى الله فى هذا البلد، مما أدى إلى استغراب مستمعيه وأدى إلى تصفيق وهتافات حادة من أعوانه الحضور ممن هم على شاكلته "إخوان".
فى اليوم الأول لاستلامه مهام العمل منعه أمن المحافظة من الدخول بـ "الجلابية" فقال للأمن أن مبأستريحش غير فيها.. قالوا له: مينفعش يا أفندم.. ورجع لبس بدله وجاء للمكتب.. طبعاً لغاية كده ومفيش استهبال بعد كده.!
هل سعد الحسينى بن مدينة المحلة الكبرى ونائبها السابق فى البرلمان لا يعلم أن بلده "المحلة" فيها شلل من البلطجية والحرامية والنصابين وكل اللى زار المحلة عارف المعلومات دى كويس لدرجة إن اللى بينزل المحلة بيمسك جيوبه بإيده لغاية ميخرج منها لضمان وجود أمواله فى جيبه يرجع بيها لبلده بدلا من أن يعود إليها مترجلاً.. مانشرش الإسلام فيها ليه وحث الأهل والأحباب والمريدين على احترام الضيوف وإكرامهم وعدم سرقة الناس؟
هل يعلم سعد الحسينى أن كفر الشيخ من البلاد التى يحافظ أهلها على الصلوات الخمس وأهلها أكثر تديناً من أي بقعة أخرى فى مصر ويتسمون بالطيابة التراحم والتحاب والكرم واحترام الآخر وإكرام الضيف ومعظمهم أثرياء لا ينظرون لجيوب غيرهم؟
تصريحاته فى أول يوم بأنه لا يفهم فى العمل التنفيذى كفيلة تماماً بإعفائه من المنصب وكيف لرئيس جمهورية يضع واحد مبيفهمش فى مكان عايز حد بيفهم.. أكيد مفيش غيره يا جايبه يتعلم ويتمرن لغاية ميفهم ويكون خرب البلد بجهله قبل ميمشى!!
المحافظ مكبر دماغه تماماً ومبيعبرش حد ومبيكلمش ولا بيرد على حد واللى مش عاجبه يخبط دماغه فى أي جدار على مزاجه والمبررات "لا يكلف الله نفساً إلاَّ وسعها" والغريب أنه ممكن يرد عليك برسالة.. لأن وقته سامح له بالكتابة ومش سامح له بالكلام.. والمعروف أصلاً عنه إنه شخص لكاك؟؟
دخل مسجد فى الرياض على بعد 20كيلو من عاصمة المحافظة صلى وسلم وبعد الصلاة قام يقول كلمة للحضور واحد محترم متدين من أهل البلد مخافش منه وقال له يا سيادة المحافظ أتعلمنا منكم إن المساجد مخصصة للعبادة مش للكلام لو عايز تقول حاجة اتفضل فى الشارع وكلنا حنسمعك.. وخرج على التو واستقل السيارة وغادر المكان.. بس أعتقد إنه مش حيسيب الموضوع ده لأهل الرياض.. ويبقوا يقابلونى لو خدوا خدمة من تنمية المحافظة لغاية الحسينى ميسيب المحافظة بمزاجه.. وحتفضل طرقهم زى ما هي زى الزفت والقطران وحتتخرب بيوتهم واحتمال يقلع لهم الشجر من الشوارع عشان يأكد للدنيا انهم عالم همل وميستاهلوش وبلدهم وسخة زيهم..!!
أخونا المحافظ يبدو أن دماغه بتوحى له أنه لازم يذل الكلاب ويجريها وراه -طبعاً كلنا عارفين إنه بينه وبينهم تار بايت لأن الحسينى أيام ما كان مسجون الكلاب ياما ذلته فى الزنازين- عارفين عمل إيه فيها: أمر بإحضار جميع الكلاب البوليسية فى المحافظة فى جو حراسة غريب لاصطحابه فى جولة الاحتفال بالعيد القومى للمحافظة وأجبر الكلاب على حراسته ومقدرش حد يقرب منه.. فى نهاية الجولة بص للكلاب وقال لهم: عرفتوا يا ولاد الكلب إن الدنيا مبتدومش لحد، ويوم لك ويوم عليك.. والله لأذلكم فى كل جولاتى ومهمتكم محدش يقرب منى ولا يطلب منى حاجة لأنى مش عامل حاجة لحد م الآخر.. وحأذلكم انتوا والناس؟
يا باشا متزعلش منى أنا تربية ازهرية اسمح لى أقول لك: احنا عارفين انكم بتعملوا للنهضة لأن شعاركم فى الانتخابات "النهضة إرادة شعب" أدعو الله أن يجعلها "نهضة وتزول".. خليتوا الناس بالغباء السياسي تترحم على أيام نظام مبارك.. وطبعاً لأن السرقة حرام فرجعوا الثورة لأصحابها ومتخافوش محدش حيجرؤ على سجنكم مرة تانية وده وعد منى شخصياً بذلك.